sika
sika so kalakal
tan kaogesan na kanunutan ko
sika so lualiket tan ermen na matak
sika so esaes
ingal tan kareenan na pakarngel ko
sika so Gumamela Celis
angob na rosas ed labi tan kaboasan
sika so engas
samit tan pait na bibil ko
sika so tula
bilay tan patey na ingkamakatak
sika so aplos
petang tan betel na dakulap ko
sika so panangarotibok na puso ed pagew ko
sika so taoen tan dalen
sika so kamundoan
mundo ya nanlapuan ko
sika so bilang
minuto ed kada oras
agew na bulan ed unlalabas iran taon
sika
sika so Urdujana daan tan balon Pangasinan
sika et siak
siak et sika lan lamang
pinalsan pinankasakey
anino tan laman na dios
ya ag naigulis so lupa