Kumusta ka agi'n abayag ya ag anengneng?
Tinmakken ka met la, gulisan lay moling,
Anto'y gagawaen mo oras so sasayangen
Agmo la ipapanabwas so nepeg mon gawaen.
Anto tan ta agi so abalitaan ko
Tinaynan ka kono na lakin inar-aro,
Sika'y asakitan, asaksak ed puso
Kanyan anggad natan nakal so ilalo.
Bangbalet mairap so manbukbukor ed bilay
Duma'y walay pamilya, asawan kaantabay,
Walay mamoyok ed sika no laman walad beblay
Diad samit tan pait walay kaagapay.
Kanyan agi agmo la liliknaen ya onong
Saratay apalabas lingwanan mo la komon,
Sakit na linawa sikara so iponpon
Manpasimbalon bilay ka, nepeg mo lay ombangon!
Agmo la alagaren ya onkebet lay gana-gana
Agkala onoogaw, bang mas onaakolaw la,
Labay mo tan tawagen kan "akolaw ya marikit"
Maong labat no magnayon so limgas tan balingit.
No inatey kan akolaw ya marikit, kuan di laki,
Kaskasiyan kan maong, abageyen mo'y dili
Kasabim ed tawen, liwawa'y ompelnak
Sikay manampatot na angkakabaleg ya p-lt-k!